धुळे : शिरपूर तालुक्यातील राष्ट्रीय महामार्ग क्रमांक ५२ वर दहिवद गावाजवळ पोलिस वाहनाचा भीषण अपघात झाला. या अपघातात एका पोलीस अंमलदाराचा मृत्यू झाला असून इतर दोघे अंमलदार गंभीर जखमी झाले आहेत. या घटनेमुळे संपूर्ण पोलीस विभागात हळहळ व्यक्त केली जात आहे.
अपघात कसा घडला?
महामार्ग वाहतूक शाखा, शिरपूर यांचे बोलेरो वाहन (क्रमांक MH18 BX 0232) सोमवारी सकाळी गस्तीसाठी जात होते. अचानक गाडीचा मागील टायर फुटला. त्यामुळे वाहनावरील नियंत्रण सुटले व बोलेरो महामार्गावर पलटी झाली. वाहन पूर्णपणे नुकसानग्रस्त झाले.
मृत्यू व जखमींची माहिती
या अपघातात तीन पोलीस अंमलदार गंभीर जखमी झाले.
नवल नवल सिंग वसावे
प्रकाश जाधव
अनिल पारधी
जखमींना तात्काळ जवळील रुग्णालयात दाखल करण्यात आले. मात्र उपचार सुरू असताना पोलीस अंमलदार नवल वसावे यांचा मृत्यू झाला. त्यांच्या निधनाने शिरपूर तालुका पोलीस ठाणे व संपूर्ण पोलीस वर्तुळात शोककळा पसरली आहे. उर्वरित दोन्ही जखमींवर उपचार सुरू आहेत.
सुरक्षा व्यवस्थेवर प्रश्नचिन्ह
पोलिसांची वाहने सुरक्षित व सक्षम असायला हवीत, असा जनतेचा विश्वास असतो. मात्र या घटनेत पोलिस वाहनाचा टायर फुटून अपघात झाल्याने वाहनांच्या देखभाल व्यवस्थेबाबत गंभीर प्रश्नचिन्ह निर्माण झाले आहे. स्थानिकांमध्ये याबाबत चर्चा सुरू असून पोलिसांच्या जीवितास धोका निर्माण करणाऱ्या अशा त्रुटींवर तातडीने उपाययोजना करणे आवश्यक असल्याचे मत व्यक्त होत आहे.
तपास सुरू
दरम्यान, शिरपूर पोलिसांनी अपघाताचा पंचनामा केला असून पुढील तपास सुरू आहे.
मुख्य संपादक – गणेश दगा पाटील.
