शिरपूर
खरीप हंगाम तोंडावर असताना शेतकऱ्यांना वेळेवर आणि योग्य दरात खते उपलब्ध व्हावीत, यासाठी प्रशासन सज्ज झाले असून खत वितरण प्रक्रियेत कोणत्याही प्रकारचा गैरप्रकार सहन केला जाणार नाही, असा ठाम इशारा कृषी विभागाचे गुणवत्ता नियंत्रक निरीक्षक विशाल मोटे यांनी दिला.
शिरपूर पंचायत समिती सभागृहात तालुक्यातील कृषी निविष्ठा विक्रेत्यांची खरीपपूर्व नियोजन बैठक व साथी पोर्टल संदर्भातील प्रशिक्षण पार पडले. यावेळी मार्गदर्शन करताना मोटे बोलत होते.
खत वितरणात पारदर्शकता आणि शिस्त राखण्यावर भर देत त्यांनी स्पष्ट केले की, खते विक्री करताना ई-पॉस मशीनचा वापर बंधनकारक करण्यात आला आहे. तसेच तालुक्यासाठी उपलब्ध होणारा खतसाठा तालुक्यातच विक्री करणे आवश्यक असून, शेतकऱ्यांच्या जमिनीच्या क्षेत्रानुसारच खत विक्री केली जावी.
युरियाच्या अनियंत्रित वापरावर लगाम घालण्यासाठी प्रति शेतकरी २० पेक्षा जास्त बॅग विक्री झाल्यास तपासणी केली जाईल, असा इशाराही त्यांनी दिला. खतसाठ्याची मोजणी सहाय्यक कृषी अधिकाऱ्यांच्या उपस्थितीतच करणे बंधनकारक राहणार असून, शेतकऱ्यांसाठी असलेला साठा इतर औद्योगिक वापरासाठी वळवू नये, यावर प्रशासन विशेष लक्ष ठेवणार आहे.
जादा दराने खत विक्री करणाऱ्यांवर कडक कारवाई केली जाईल, असे स्पष्ट करत मोटे यांनी विक्रेत्यांनी केवळ विक्रीपुरते मर्यादित न राहता शेतकऱ्यांना योग्य कृषी मार्गदर्शन करण्याचे आवाहन केले.
प्रभारी तालुका कृषी अधिकारी कैलास गोपाळ यांनीही विक्रेत्यांनी नियमांचे पालन करताना शेतकऱ्यांची गैरसोय होणार नाही, याची विशेष काळजी घ्यावी, असे सांगितले.
या बैठकीस शिरपूर तालुका सीड्स, पेस्टिसाइड व फर्टिलायझर्स डीलर्स असोसिएशनचे अध्यक्ष हेमंत चौधरी, उपाध्यक्ष गौरव गोयल, सचिव भूपेश अग्रवाल, खजिनदार निलेश अग्रवाल यांच्यासह तालुक्यातील मोठ्या संख्येने कृषी निविष्ठा विक्रेते उपस्थित होते.
मुख्य संपादक – गणेश दगा पाटील.
