शिरपूर | प्रतिनिधी
धुळे जिल्ह्यात कायदा व सुव्यवस्था अधिक सक्षम करण्यासाठी कठोर आणि प्रभावी पावले उचलण्यात येणार असून, जिल्हा गुन्हेगारीमुक्त करण्यासाठी पोलिस प्रशासन कटिबद्ध असल्याचा ठाम संदेश नवनियुक्त पोलीस अधीक्षक विशाल आनंद सिंगुरी यांनी दिला. पदभार स्वीकारल्यानंतर आयोजित करण्यात आलेल्या पहिल्याच पत्रकार परिषदेत त्यांनी आपल्या कामाची दिशा स्पष्ट करत गुन्हेगारीविरोधात व्यापक कृती आराखडा जाहीर केला.
पोलीस अधीक्षक सिंगुरी यांनी स्पष्ट शब्दांत सांगितले की, जिल्ह्यात कोणत्याही प्रकारचे अवैध धंदे खपवून घेतले जाणार नाहीत. विशेषतः ड्रग्ज, गांजा, भांग यांसारख्या तरुणाईला उद्ध्वस्त करणाऱ्या नशिल्या पदार्थांच्या विक्री व तस्करीवर कठोर कारवाई केली जाईल. तसेच बनावट दारू निर्मिती, सट्टा, मटका आणि इतर अवैध व्यवसायांचे समूळ उच्चाटन करण्यासाठी विशेष मोहीम राबवली जाणार असल्याचे त्यांनी सांगितले.
वाढत्या शहर विस्तारामुळे निर्माण झालेल्या वाहतूक कोंडीच्या समस्येकडेही त्यांनी गांभीर्याने लक्ष वेधले. वाहतूक व्यवस्था सुरळीत करण्यासाठी शिस्तबद्ध नियोजन केले जाईल तसेच नियमांचे उल्लंघन करणाऱ्यांवर कडक कारवाई करण्यात येईल, असे संकेत त्यांनी दिले.
प्रलंबित गुन्ह्यांतील फरार आरोपींना अटक करणे हे पोलिसांसमोरील मोठे आव्हान असल्याचे सांगत, विशेष शोध मोहीम राबवून अशा आरोपींना लवकरात लवकर कायदेशीर प्रक्रियेत आणले जाईल, असे त्यांनी स्पष्ट केले. यामुळे गुन्हेगारांमध्ये पोलिसांचा धाक निर्माण होईल, असा विश्वास त्यांनी व्यक्त केला.
“पोलीस आणि जनता यांच्यातील समन्वय हा गुन्हेगारी रोखण्यासाठी अत्यंत आवश्यक आहे. नागरिकांनी निर्भयपणे माहिती द्यावी. संशयास्पद हालचाली, अवैध धंदे किंवा कोणतीही गोपनीय माहिती तात्काळ पोलिसांपर्यंत पोहोचवावी,” असे आवाहनही त्यांनी केले.
यावेळी त्यांनी सांगितले की, वरिष्ठांच्या आदेशांची जिल्ह्यात काटेकोर अंमलबजावणी केली जाईल. माध्यमांशी नियमित समन्वय राखण्यासाठी पोलीस अधीक्षक, अतिरिक्त पोलीस अधीक्षक तसेच स्थानिक गुन्हे शाखेचे अधिकारी वेळोवेळी अधिकृत माहिती प्रसारमाध्यमांना देणार आहेत.
आगामी बकरी ईद सणाच्या पार्श्वभूमीवर जिल्ह्यात विशेष पथके तयार करण्यात आल्याची माहिती देत, कायदा व सुव्यवस्था अबाधित राखण्यासाठी नागरिकांच्या सहकार्याची अपेक्षा त्यांनी व्यक्त केली.
पत्रकार परिषदेला अतिरिक्त पोलीस अधीक्षक अजय देवरे तसेच स्थानिक गुन्हे शाखेचे पोलीस निरीक्षक श्रीराम पवार उपस्थित होते.
मुख्य संपादक – गणेश दगा पाटील.
