शिरपूर तालुका पोलीस स्टेशन, सांगवी येथील कार्यालयीन विस्तारीकरण, बीट रूम, अधिकारी कक्ष व बहुउद्देशीय हॉल या नव्या सुविधांचे लोकार्पण राज्याचे पणन व राजशिष्टाचार मंत्री तथा जिल्ह्याचे पालकमंत्री जयकुमार रावल यांच्या हस्ते करण्यात आले.
या सोहळ्यास माजी शालेय शिक्षण व क्रीडामंत्री आमदार अमरीशभाई पटेल, आमदार काशीराम पावरा, जिल्हा पोलीस अधीक्षक श्रीकांत धिवरे, उपविभागीय अधिकारी शरद मंडलिक, उपविभागीय पोलीस अधिकारी सुनील गोसावी, तहसीलदार महेंद्र माळी, गटविकास अधिकारी प्रदीप पवार, जि.प.चे माजी अध्यक्ष तुषार रंधे, माजी उपाध्यक्ष देवेंद्र पाटील यांच्यासह विविध मान्यवर, पदाधिकारी व नागरिक मोठ्या संख्येने उपस्थित होते.
पालकमंत्री जयकुमार रावल यांनी यावेळी पोलीस कर्मचाऱ्यांच्या निवासी वसाहतीसाठी प्रयत्न करून आवश्यक सुविधा उपलब्ध करून देण्याचे आश्वासन दिले. “स्वंयसेवी संस्थांच्या मदतीने उभारलेला हा विकास उपक्रम जिल्ह्यातील इतर पोलीस ठाण्यांसाठी मार्गदर्शक ठरेल”, असेही त्यांनी नमूद केले.
आमदार अमरीशभाई पटेल यांनी पोलीस निरीक्षक जयपाल हिरे यांच्या कामगिरीचे विशेष कौतुक केले. “मागील दहा वर्षांत अनेक अधिकारी येथे आले-गेले, मात्र हिरे यांनी सामाजिक भावनेतून व्यापक विचार करून सुंदर वास्तू उभारली आहे”, असे गौरवोद्गार त्यांनी काढले.
पोलीस निरीक्षक हिरे यांनी प्रास्ताविकात सांगितले की, विस्तारीकरणासाठी सांगवी ग्रामपंचायतीने जागा उपलब्ध करून दिल्याने अडचण दूर झाली. विविध संस्थांचे सहकार्य, मान्यवरांचे मार्गदर्शन व नागरिकांचा सहभाग यामुळे हे कार्य शक्य झाल्याचे त्यांनी स्पष्ट केले.
कार्यक्रमाच्या प्रारंभी आदिवासी परंपरेनुसार मान्यवरांचे स्वागत करण्यात आले. त्यानंतर विविध कक्षांचे लोकार्पण झाले. यावेळी पोलीस स्टेशनला मदत करणाऱ्या व्यक्ती व संस्थांचा तसेच शिरपूर टोल नाक्यावरील कर्मचाऱ्यांचा सन्मान करण्यात आला.
या कार्यक्रमाचे सूत्रसंचालन यशवंत निकवाडे यांनी केले तर आभारप्रदर्शन उपविभागीय पोलीस अधिकारी सुनील गोसावी यांनी केले
मुख्य संपादक – गणेश दगा पाटील.
