शिरपूर | प्रतिनिधी महामार्गावर प्रवाशांना टार्गेट करून बॅग लिफ्टिंग करणाऱ्या परराज्यातील गुन्हेगारांच्या टोळीवर शिरपूर तालुका पोलिसांनी जबरदस्त कारवाई करत मुख्य आरोपीला मुद्देमालासह जेरबंद केले आहे. पोलिसांच्या या धडाकेबाज कारवाईमुळे गुन्हेगारांमध्ये खळबळ उडाली असून नागरिकांकडून पोलिसांचे कौतुक होत आहे. दि. ०५ मे २०२६ रोजी सांगवी गावाच्या शिवारातील राष्ट्रीय महामार्ग क्रमांक ५२ वरील देव मोगरा चहा हॉटेलसमोर उभ्या असलेल्या इनोव्हा (MH 41 AK 0101) गाडीतून अज्ञात चोरट्यांनी फिर्यादीची बॅग लंपास केली होती. या बॅगेमध्ये रोख रक्कम, एटीएम कार्ड, डेबिट कार्ड, पॅन कार्ड, आधार कार्ड, ड्रायव्हिंग लायसन्ससह महत्त्वाची कागदपत्रे होती. घटनेनंतर शिरपूर तालुका पोलीस ठाण्यात गु.र.नं. १४७/२०२६ अन्वये BNS कलम ३०३(२) प्रमाणे गुन्हा दाखल करण्यात आला होता. गुन्ह्याचे गांभीर्य लक्षात घेऊन पोलिस निरीक्षक जयपाल हिरे यांच्या नेतृत्वाखाली गुन्हे शोध पथकाने तपासाची चक्रे वेगाने फिरवली. तांत्रिक विश्लेषण, गोपनीय माहिती आणि सततच्या पाठपुराव्यानंतर आरोपी मध्यप्रदेश राज्यातील धार जिल्ह्यातील असल्याचे निष्पन्न झाले. त्यानुसार पोलिसांनी सापळा रचून कल्याण जगदोश आलावा (वय २५) रा. डेडगाव, ता. मनावर, जि. धार (मध्यप्रदेश) याला अटक केली. आरोपीला न्यायालयात हजर केले असता न्यायालयाने त्यास ११ मे २०२६ पर्यंत ४ दिवसांची पोलीस कोठडी सुनावली आहे. चौकशीदरम्यान आरोपीकडून ₹५५ हजार रोख रक्कम, इयरबड्स, घड्याळ, विविध बँकांचे एटीएम व डेबिट कार्ड, पॅन कार्ड, आधार कार्ड आणि ड्रायव्हिंग लायसन्स असा एकूण सुमारे ₹५७ हजारांचा मुद्देमाल पोलिसांनी हस्तगत केला आहे. सदरची उल्लेखनीय कारवाई पोलीस अधीक्षक विशाल आनंद सिंगुरी, अपर पोलीस अधीक्षक अजय देवरे, उपविभागीय पोलीस अधिकारी विश्वजीत जाधव यांच्या मार्गदर्शनाखाली पोलिस निरीक्षक जयपाल हिरे यांच्या नेतृत्वात पोहेका सुनील पाठक, संतोष पाटील, योगेश मोरे, स्वप्नील बांगर आणि विजय डिवरे यांच्या पथकाने यशस्वीरीत्या पार पाडली
मुख्य संपादक – गणेश दगा पाटील.
