शिरपूर (ता. धुळे) – शिरपूर शहरात अल्पवयीन मुलीवरील अत्याचार प्रकरणाच्या निषेधार्थ काढण्यात आलेल्या मोर्चानंतर रास्ता रोको आंदोलनाला हिंसक वळण लागले. या गोंधळात शिरपूर तालुका पोलीस ठाण्याचे निरीक्षक जयपाल हिरे यांच्यावर अज्ञात व्यक्तीने तीक्ष्ण हत्याराने हल्ला केला. त्यांना प्राथमिक उपचारानंतर पुढील उपचारासाठी धुळे येथे हलविण्यात आले आहे.
सांगवी पोलीस ठाण्यात आठ वर्षीय बालिकेवर लैंगिक अत्याचारप्रकरणी गुन्हा दाखल करण्यात आला आहे. या घटनेच्या निषेधार्थ आदिवासी संघटनांनी सोमवार (दि. १८) रोजी शिरपूर शहरात मूक मोर्चा काढला. मोर्चाच्या अखेरीस उपविभागीय पोलीस अधिकारी सुनील गोसावी यांना निवेदन देऊन आरोपीवर कठोर शासन करण्याची आणि खटला जलदगती न्यायालयात चालवण्याची मागणी करण्यात आली. हा मोर्चा शांततेत पार पडला.
मात्र काही वेळानंतर शिरपूर येथील गुजराती कॉम्प्लेक्ससमोर काही तरुणांनी अचानक रास्ता रोको केला. त्यामुळे मोठी गर्दी जमून वाहतूक ठप्प झाली. माहिती मिळताच निरीक्षक हिरे घटनास्थळी दाखल झाले आणि आंदोलकांना समजवण्याचा प्रयत्न केला. त्यावेळी काही आंदोलक आक्रमक झाले. पोलिसांनी जमाव पांगवण्यासाठी सौम्य बळाचा वापर केला.
दरम्यान गर्दीचा फायदा घेत अज्ञात व्यक्तीने हिरे यांच्या पाठीमागून तीक्ष्ण हत्याराने वार केला. तातडीने त्यांना रुग्णालयात दाखल करण्यात आले असून पुढील उपचारासाठी धुळे येथे हलवण्यात आले आहे.
रास्ता रोको करणाऱ्या आंदोलकांनी आरोपीला ताब्यात द्यावा आणि तत्काळ फाशी द्यावी अशा बेकायदेशीर मागण्या केल्या. त्यामुळे परिस्थिती तणावपूर्ण झाली आहे. हल्लेखोराचा शोध घेण्यासाठी विशेष पथक कार्यरत असून संबंधितांवर कठोर कारवाई केली जाईल, असे पोलीस प्रशासनाने स्पष्ट केले आहे.
मुख्य संपादक – गणेश दगा पाटील.
