धुळे शहरातील शासकीय दूध डेअरी परिसरात बनावट देशी-विदेशी दारू तयार करण्याचा कारखाना स्थानिक गुन्हे अन्वेषण विभागाच्या पथकाने उध्वस्त केला. या कारवाईत मोठ्या प्रमाणावर दारू निर्मितीसाठी लागणारे रसायन, स्पिरिट, बाटल्या, बुच लावण्याचे मशीन व इतर साहित्य जप्त करण्यात आले असून, एका व्यक्तीविरुद्ध गुन्हा दाखल करण्यात आला आहे.
धुळे जिल्ह्यात आगामी सण आणि उत्सवाच्या पार्श्वभूमीवर अवैध दारू व अमली पदार्थ तस्करीविरोधात कठोर कारवाई करण्याचे आदेश पोलीस अधीक्षक श्रीकांत धिवरे यांनी सर्व पोलीस ठाण्यांना तसेच स्थानिक गुन्हे अन्वेषण विभागाला दिले होते. त्यानुसार स्थानिक गुन्हे अन्वेषण विभागाचे निरीक्षक श्रीराम पवार यांनी स्वतंत्र पथके नियुक्त केली.
दरम्यान, पोलीस निरीक्षक श्रीराम पवार यांना शासकीय दूध डेअरी परिसरात बनावट दारू तयार होत असल्याची गुप्त माहिती मिळाली. त्यानंतर त्यांनी पोउनि अमित माळी, पोलीस अंमलदार मच्छिद्र पाटील, हेमंत बोरसे, प्रल्हाद वाघ, योगेश चव्हाण, हेकॉ. शिला सुर्यवंशी व हर्षल चौधरी या पथकासह छापा टाकला.
या कारवाईत सहजीवन नगरातील गणेश नारायण निकम यांच्या ताब्यातील घरामध्ये बनावट दारू तयार करण्याचा कारखाना आढळून आला. घटनास्थळावरून पोलिसांनी स्पिरिट, बाटल्यांना बुच लावण्यासाठीचे मशीन, रिकाम्या बाटल्या, बूच, स्टिकर्स व इतर साहित्य असा एकूण ₹१,६८,०९०/- किमतीचा मुद्देमाल जप्त केला.
गणेश नारायण निकम याच्याविरुद्ध धुळे शहर पोलीस ठाण्यात गुन्हा दाखल करण्यात आला आहे. विशेष म्हणजे यापूर्वी देखील या आरोपीविरुद्ध गंभीर गुन्हे नोंद असल्याचे प्राथमिक तपासातून समोर आले आहे. सहजीवन नगरातून तयार होणारी ही बनावट दारू नेमकी कोणत्या तस्कराला किंवा गटाला पुरवली जात होती, याबाबतचा तपास पोलिसांनी सुरू केला आहे.
मुख्य संपादक – गणेश दगा पाटील.
